طريقة المندي بدون حفر ولادفن

طريقة المندي بدون حفر ولادفن

بسم الله الرحمن الرحيم

السلام عليكم ورحمه الله وبركاته

حيا الله الجميع ..

اليوم نبي نتعلم افضل طريقة لعمل المندي في البر من دون حفر ولا دفن ولا برميل ولا تعب
لأن الكثير منكم يعرف المندي وشعبيته او انتشاره عند بعض الناس لما فيه من اللذة والطعم ،،
ولكن المشكلة التي تواجهم هي الحفر والدفن فيبيله اول شي يحفر للبرميل وبكذا يكون راح الوقت ..

فهذه هي الطريقة المناسبة للمندي بالبر ،، والطريقة سمعنا ان بعض الشباب جربوها ؛؛
ما شاء الله تبارك الله كلو اصابعهم وراها ....<<<< ولايكثر


اولاً الأدوات :

قدر حجم مناسب لكمية الدجاج او اللحم ..

فحم وما يصلح لوه الفحم الصناعي ..

وبعد كذا اول ما تنزل بالبر ضبط مكان الفحم بحيث يكون مستدير بدقة ؛؛
واوسع من القدر بشوي ..

وبعد كذا حط كمية كثيره شوي من الفحم وشبه وخله ليما يجمررررر كله مايبقا به ولا حبة ..

بعد كذا تكون متبل اللحم بالطريقة التالية:

جب لك بادية صغيرة وضع فيها :

2 صلصة السعودية
1 ليمونة معصورة
ملعقة كبيرة ثوم مهروس
3 فناجيل ملح للحم 2للدجاج
1فنجان كمون وبنفس المقاس
فل فل احمر
وملعقة خل تفاح
وادبل الكمية كل ماكثرت اللحم


وبعد كذ اخلط البهارات لين يتجانسن وخففه بمويا شوي بس ،،

وبعد كذا جب اللحم وضعه في وسط الأناء وابد قلبه لين يتمدلغ كلة بالبهارات

واذا شفت انها ناقصة زد عليها بس تكون المقاسات متناسبة ،،

وبعد ماقلبتها الحين شطبها بالسكين وضعها في ثلاجة لمدة 3 ساعات

وبعد كذا تطلعها وتجي للنار المجمره وتوسع الجمر على مقاس القدر ،،

وبعد كذا جب اللحم وضعه فوق النار مبااااااااشرة وبسرعة ضع القدر مقلوبا فوقها

وابد فر القدر يمين يسار لين ينزل شوي 4 سم تقريبا ..


طيب وبعد ماسوينا كذا وقلبنا القدر بحيث مايطلع ولا نصف جمره برا حط ثقل فوق القدر عشان مايطلع من البخار ؛؛
واحذر ان يكون هناك تنسيم لأنه لو كان فيه تنسيم راح يحترق اللحم ..

والحين بعد ماحطيت اللحم اجلس ساعة ونصف تقريبا او اكثر بقليل ؛؛
وبعد كذا ارفع القدر على الخفيف وشل اللحم بسرعة ..

بعضكم يسأل يقول : ما يحترق اللحم ؟ لاا لاا ابد اذا كان القدر محكم ولا فيه اي تنسيم ماراح يحترق اللحم لو يجلس سنة لو يطفي الجمر ما يحترق اللحم ..

وبعد كذا كله بالهنا والعافية و أتمنى ان شاء الله ان يعجبكم